
Li navçeyên Amedê ji bo zarokan şano hate pêşandan 

2025-06-22 10:45:47


	AMED - Di roja duyemîn a Rojên Şanoya Zarokan a Gerok a Şaredariya Bajarê Mezin a Amedê de li navçeyên Lice, Gêl û Karazê şano hatin pêşandan.&nbsp;

	Şaredariya Bajarê Mezin a Amedê, ji bo zarokên li navçe û taxên gundewar ên ku zehmetiyê dikişînin bigihîjin çalakiyên çand û hunerî, 2’yemîn Rojên Şanoya Zarokan a Gerok li navçeyên Lice, Gêlê û Karazê li dar xist. Di çarçoveya çalakiyan de navçeyan navbihûrî komên jonglêran kortej çêkirin, zarok xistin nav meşê û vexwendin lîstikê.

	&nbsp;

	Li navenda Licê, lîstikvanan zarok berhev kirin û bi çepik û stranan bi wan re heta Parka Medenî Yildirim meşiyan. Li parkê, lîstika Nîsko ku ji aliyê Koma Golge Sahne ya ji Stenbolê hatibû, hat nîşandan.

	&nbsp;

	Li Taxa Katînê ya gundewar a navçeya Karazê jî koma SOS Jonglêr derkete pêşberî zarokan. Zarokên ku ji bo çalakiyê hatibûn cem hev, bi dilxweşî kêfxweş bûn.

	&nbsp;

	Li navçeya Gêlê jî zarokên ku li Parka Meydanê civiyabûn, pêşandana koma jonglêr a Mavi Mask û lîstika Kirmancî ya bi navê Vewremendin ku ji aliyê Navenda Hunerên Zarokan a Diyarbekirê ve hatibû lîstin, temaşe kirin.

	&nbsp;

	Zarok û malbatê wan ên beşdarî çalakiya li Liceyê bûn, kêfxweşiya xwe ji çalakiyê anîn ziman. Zarok Eva Huseyînoglu spasiya Şaredariya Bajarê Mezin kir ku ew gelekî kêfxweş kirine. Berfîn Atagul ku zarokên xwe anîbû çalakiyê jî spasî kir û got: “Çalakiyeke wiha ji bo zarokan gelekî xweş û hêja ye. Pêkanîna vê çalakiyê gelekî qenc bû ku dilê zarokan şad kir. Bi taybetî girîngiya ku didin hunerê û bi giştî şanoyê gelekî baldar û girîng e. Li navçeya me berê çalakiyên bi vî rengî nedibûn, çalakiyeke wiha hem ji bo me hem jî ji bo zarokan gelekî baş bû.”

	&nbsp;

	Zaroka bi navê Elîf Eser jî got: “Ger çalakiyên wiha pir caran bibin, em ê bêtir kêfxweş bibin. Ez spasiya wan dikim ku me kêfxweş kirin. Ji ber ku em ketine betlaneyê, ev çalakiyeke bêkêmasî bû.”

	&nbsp;

	ROJÊN ŞANOYÊ DÊ BIDOME

	&nbsp;

	Rojên Şanoyê dê li navçeyên Pîran, Pasûr, Çermûg, Çingûş, Bismil, Çinar, Hênê, Erxenî, Hezro û Farqînê jî bidomin. Lîstikên şanoyê dê her roj di sê navçeyên cuda de, li nav parkan saet di 19:00’an de bêne lîstin.

	&nbsp;